Kolore beltzari buruz.

Beltza heriotzaren irudikapen subjektiboa da, hau da, heriotzaren irudikapen zuzena.

Bizitzaren koadroan figurak baino ez gara behin-behinekoz. Atzealdetik nabarmentzen diren figurak, atzealdea beltza baita.

Kolore beltza ezereza irudikatzeko erabiltzen den zerbait da, eta hori ez da ezer.

Beltza denbora luzez egon nahiko ez zenukeen leku bat da.

Baliteke beltz kosmikoa unibertso ikusezinaren eta ikus daitekeenaren arteko muga mugikor eta lauso horretatik datorren kolorea izatea.

Ezinezkoa da beltz absolututik harago joatea.

Nire ustez, kolore beltza ez da argirik eza, ikus daitekeen erabateko argi-xurgapena baizik.

Beltz kolore bikain bat hobetu egin daiteke, ingurune argi eta argiztatuarekin kontrastatuta.

Argi zuri on batek argiztatzen duen kolore beltza ez bada behar bezain beltza, ez da argiagatik, beltzagatik baizik; horrek esan nahi du beltza ez dela kalitate onekoa.

Iluntasunak kolore gisa, kolore beltz gisa, jardun dezan, beharrezkoa da inguruan argi argia izatea.

Kolore beltzak beretzat hartzen du argi guztia, baina bada paradoxa bat: zerbait utzi behar du bere gose amaiezinaren eragina hauteman ahal izateko.

Beltza iluntasun zeharkaezina da, ondo argiztatutako leku batetik ikusita.

Kolore beltzak beretzat hartzen du argia, eta bere atzealdera eramaten du aldi berean.

Begiak itxi edo leihorik gabeko logela itxi batean edo argirik gabeko kobazulo batean sartzen bazara, iluntasunaren esperientzia sentitzen duzu, baina ez beltzaren esperientzia. Izan ere, beltza iluntasuna da, baina argitan jarrita. Bestalde, argi-estimulurik gabe hautematen den iluntasuna ez da beltza, grisa baizik. Dirudienez, erretinako zelula batzuek, off-cell deiturikoek, sortzen dute sentsazio kromatiko hori, zelula horiek arduratzen baitira ikusmenaren zirkuitu neuronala elikatzeaz.

Ireki begiak kolore beltzari.

Argia erabat xurgatzeak itzala xurgatzea ere esan nahi du. Ezin da itzalik proiektatu % 100 iluna den objektu baten gainean.

Beltza da kolorerik eskuzabalena, ezezkoan.

Beltza oso kolore interesgarria da, oso barnerakoia delako.

Historiako koadrorik beltzena imajinatzen dut. Ez da margolan abstraktu bat.

Belztasuna banatzea. Belztasuna norberaren araberakoa izan dadila. Kantitate txikia, baina intentsitate handikoa. Kolore beltzaz ari garenean, intentsitatea eta kalitatea gauza bera dira.

Kolore beltzari dagokionez, bikaina onaren etsaia da. Beltza, zenbat eta ilunago, hobe.

Ezinezkoa da beltz absolututik harago joatea.

Kolore beltzaren bereizgarria antagonismoa da.

Kolore beltzaren bidea aukeratu nuen, eta berak ni aukeratu ninduen. Zalantzazko bide horretatik abiatu nintzen, haren mutur beltz absolutuaren bila.

Beste ezerk ez du ematen kolore beltzak ematen duen ezerezarekiko hurbiltasuna.

Ez espero ezer kolore beltzaren aldetik.

Ezin da ezer proiektatu kolore beltzaren gainean.

Beharbada ezin da ezer proiektatu, ezin delako gehiago proiektatu.

Kolore beltza esateko beste modu bat: Rorschach-en palinpsestoa.

Beltza da hitzematen duenaren mailan dagoen kolore bakarra. Ez baitu ezer hitzematen.

Handikerien handikeria; dena da handikeria. Kolore beltz menderaezina salbu.

Kolore beltzaren kasuan, ez du mugarik gastuak. Kolore beltzarentzat dena.

Kolore beltza zeinu guztiz naturala da eta milaka urtetako kultura du bere gainean.

Kolore beltzak ondo justifikatutako kondaira du atzean. Kondaira beltza, noski.

Kolore beltza lantzeak zentzua ematen dio nire bizitzari.